Archwiliwch
I ddathlu Wythnos Gyrfaoedd (3 – 8 Mawrth 2025), rydym yn tynnu sylw at y proffesiwn gwaith chwarae trwy rannu gwybodaeth am yr hyn sydd ei angen i fod yn weithiwr chwarae a sut i ddatblygu eich gwybodaeth a’ch hyfforddiant mewn gwaith chwarae.
Beth sydd ei angen i fod yn weithiwr chwarae?
Gellir disgrifio gwaith chwarae fel y grefft o weithio gyda phlant wrth iddyn nhw chwarae. Mae’n alwedigaeth gydnabyddedig gyda set o safonau proffesiynol, hyfforddiant, cymwysterau a gyrfaoedd. Deall sut i gefnogi chwarae plant yw’r dasg bwysicaf i weithiwr chwarae ac mae angen set o rinweddau penodol arnynt, gan gynnwys y gred bod gan blant yr hawl i chwarae.
Mae chwarae’n hynod fuddiol, gan helpu plant i herio eu hunain, cadw’n heini a gwneud synnwyr o bethau anodd. Yn bennaf oll, mae chwarae’n hwyl! Os ydych yn ystyried gyrfa mewn gwaith chwarae, neu’n awyddus i ddarganfod mwy, dysgwch beth mae’n ei olygu i fod yn weithiwr chwarae yn y fideo byr hwn.
Os hoffech chi becyn cyfryngau i helpu i ledaenu’r gair am yr hyn sydd ei angen i fod yn weithiwr chwarae, cysylltwch â ni.
Hyfforddiant a chymwysterau gwaith chwarae
Mae’r sector gwaith chwarae’n cwmpasu nifer o wahanol broffesiynau, y gallai llawer ohonynt elwa o hyfforddiant neu gymwysterau gwaith chwarae. Waeth beth yw eich diddordeb mewn gwaith chwarae, gall Chwarae Cymru eich helpu i ddod o hyd i’r dysg sy’n gywir i chi.
Dysgwch fwy am hyfforddiant a chymwysterau gwaith chwarae
2 – 3 Gorffennaf 2025
Y Glôb Helyg, Rhaeadr, Powys
Wythnos i fynd nes bydd archebu yn agor ddydd Mercher 12 Mawrth am 12pm.
Mae’r Fforwm Gweithwyr Chwarae yn ddigwyddiad hyfforddiant gwaith chwarae preswyl, deuddydd o hyd dan gynfas sy’n rhoi cyfle i weithwyr chwarae ddysgu oddi wrth ei gilydd a hyfforddwyr gwaith chwarae profiadol. Mae’n cynnig datblygiad proffesiynol parhaus (DPP) i’r rhai sy’n gweithio yn y sector gwaith chwarae.
Bydd nifer cyfyngedig o lefydd, felly archebwch yn gynnar i osgoi cael eich siomi.