Sicrhau ansawdd

Mae Chwarae Cymru wedi gweithio gyda’r sector gwaith chwarae i ddatblygu Chwarae o Safon: marc ansawdd gwaith chwarae.

Mae grŵp cyfeirio arbenigol wedi cefnogi datblygu’r marc ansawdd. Mae aelodau’r grŵp hwn yn cynnwys:

• Arolygiaeth Gofal Cymru
• Clybiau Plant Cymru Kids’ Clubs
• Swyddfa Comisiynydd Plant Cymru
• Blynyddoedd Cynnar Cymru
• Arbenigwyr chwarae
• Cyflogwyr gwaith chwarae o leoliadau blynyddoedd cynnar, gwaith chwarae mynediad agored a gofal plant y tu allan i oriau ysgol
• Hyfforddwyr gwaith chwarae
• Gofal Cymdeithasol Cymru
• Llywodraeth Cymru.

Mae Chwarae o Safon yn ychwanegu at ac yn disodli dau o adnoddau Chwarae Cymru:

• Yr Hawl Cyntaf… fframwaith ar gyfer asesu ansawdd gwaith chwarae (a gyhoeddwyd yn 2001)
• Yr Hawl Cyntaf – prosesau dymunol (a gyhoeddwyd yn 2002).

Bwriedir i Chwarae o Safon gael ei ddefnyddio mewn lleoliadau gwaith chwarae anrheoleiddiedig, yn ogystal â lleoliadau a reoleiddir gan Arolygiaeth Gofal Cymru (AGC). Mae hefyd yn berthnasol i’r bobl hynny sy’n ymwneud â gwaith chwarae mewn lleoliadau gwaith chwarae amhenodedig.

Dyfernir dau wahanol farc ansawdd gwaith chwarae, y naill yn canolbwyntio ar ymarfer a’r llall ar bolisi. Gall lleoliadau gwaith chwarae weithio tuag at un neu ddau o’r dyfarniadau hyn:

1. Chwarae o Safon – marc ansawdd ymarfer gwaith chwarae

Mae hwn yn asesu:

• profiadau chwarae plant
• yr amgylchedd gwaith chwarae.

Mae hwn yn addas ar gyfer lleoliadau sy’n defnyddio agwedd gwaith chwarae neu y mae eu staff wedi cwblhau hyfforddiant neu gymwysterau gwaith chwarae ac sydd am arddangos ymarfer gwaith chwarae da. Yn ogystal â lleoliadau gwaith chwarae penodedig, gall hyn gynnwys darpariaeth gwaith ieuenctid, gofal plant, addysg, chwaraeon ac iechyd hefyd.

2. Chwarae o Safon – marc ansawdd polisi gwaith chwarae

Mae hwn yn asesu:

• polisi ac ymarfer gwaith chwarae
• y sefydliad gwaith chwarae.

Mae hwn yn addas ar gyfer lleoliadau y mae eu prif ddiben yn cynnwys cefnogi chwarae plant gan ddefnyddio agwedd gwaith chwarae. Mae hyn yn cynnwys lleoliadau a reoleiddir ac anrheoleiddiedig sy’n diffinio eu hunain fel un ai darpariaeth beripatetig neu rodwyr chwarae, meysydd chwarae antur, gofal plant y tu allan i oriau ysgol, gwaith chwarae mynediad agored neu chwarae stryd. Mae’n canolbwyntio ar y polisïau, y gweithdrefnau a’r ethos sefydliadol sy’n cefnogi ymarfer gwaith chwarae. Er mwyn ennill y marc ansawdd hwn, bydd lleoliadau eisoes wedi derbyn y marc ansawdd ymarfer gwaith chwarae.

Dysgu mwy

Cysylltwch gyda ni i ddysgu mwy am sut y gallwch ymgeisio am farc ansawdd Chwarae o Safon, sy’n cael ei brofi ar hyn o bryd.