Archwiliwch
Mae Llywodraeth Cymru wedi lansio fframwaith statudol newydd ar gyfer gwaith chwarae, sy’n cynnwys Cyfarwyddydau Gwasanaeth Cymorth Ieuenctid (Darparu Gwaith Ieuenctid) (Cymru) 2026 a chanllawiau statudol Gwaith ieuenctid yng Nghymru: cyflawni dros bobl ifanc.
Mae’r fframwaith yn sefydlu trefniadau cynllunio ac atebolrwydd clir, yn ogystal â nodi ein disgwyliadau i awdurdodau lleol i asesu anghenion pobl ifanc, blaenoriaethu’r anghenion hynny a gosod amcanion i gefnogi a datblygu gwaith ieuenctid. Mae cydweithio – rhwng sefydliadau sy’n llunio a chyflawni gwaith ieuenctid, yn ogystal â phobl ifanc eu hunain – yn ganolog i’r fframwaith.
Wrth gyhoeddi’r fframwaith, mewn datganiad ysgrifenedig dywedodd Lynne Neagle AS, Ysgrifennydd y Cabinet dros Addysg:
‘Mae gan bobl ifanc rôl hanfodol i’w chwarae wrth wireddu’r fframwaith hwn. Mae’r fframwaith yn pwysleisio bod rhaid i’w barn lunio’r cynlluniau strategol gwaith ieuenctid y bydd yn ofynnol i bob awdurdod lleol, ar y cyd â phartneriaid, eu datblygu … Bydd y fframwaith hwn, ochr yn ochr â’n gwaith i ddatblygu corff cenedlaethol ar gyfer gwaith ieuenctid, yn helpu i hyrwyddo gwaith ieuenctid, gan sicrhau ei fod yn cael ei werthfawrogi a’i ddeall a’i fod yn parhau i ymateb i anghenion pobl ifanc.’
Dywed Chwarae Cymru:
‘Rydym yn croesawu cyhoeddi’r canllawiau statudol hyn. Yn benodol, hoffem dynnu sylw at y cysylltiadau sy’n cael eu gwneud rhwng y cynlluniau strategol gwaith ieuenctid a’r Asesiadau Digonolrwydd Chwarae. Rydym hefyd yn croesawu’n fawr y gydnabyddiaeth o’r aliniad rhwng gwaith chwarae a gwaith ieuenctid sy’n nodi: “Pan fyddant wedi’u halinio, gall y ddau sector hyn wella effaith ei gilydd a gwella profiadau a deilliannau. Gall arwain at ddatblygu perthnasoedd o ymddiriedaeth tymor hwy gydag unigolion wrth iddynt bontio rhwng plentyndod, llencyndod a byd oedolion ifanc.”’